الجمعة , 24 نوفمبر 2017
أخر الأخبار

مظاهرة ضد قرارالفخراني بهدم 4 عمارات بمنشيه الشهداء

شهد شارع “شل” في منشية الشهداء ـ صباح يوم امس ـ وقفة احتجاجية، تطورت إلى مظاهرة جماهيرية واسعة، بسبب “إخطار” مواطني الشارع بأن محافظ الاسماعيلية قد أصدر قرارا بهدم منازلهم. وطالبهم الإخطار بإخلاء منازلهم، ومغادرتها، خلال عشرة (10) أيام.  حامل الإخطار/الإنذار، مندوب من قسم ثاني الإسماعيلية، أبلغهم بأن الذي يمتلك منهم مسكنه، سوف يعطون له شقة بالإيجار في مدينة “المستقبل”.. من هنا جاء غضب الأهالي، لأن القرار معناه أن يتركوا مساكنهم التي تقع في قلب عاصمة المحافظة، والتي يدفعون 24 جنيها إيجارا شهريا لها، ليقيموا في مدينة المستقبل، بالإيجار، وبـ 160 جنيها فى الشهر. الإخطار والتحذير الذي يتضمنه أثار غضب أصحاب المنازل في شارع “شل”، فنظموا وقفة احتجاجية سرعان ما تطورت إلى “مظاهرة” بعد أن انضم إليهم عدد من المواطنين، تضامنا مع سكان هذه البيوت، الذين اتهموا المحافظ بأنه يأخذ منازلهم ـ حسب قولهم ـ ليهدمها، ثم يبيع الأرض، ليقيم عليها رجال أعمال مشروعات خاصة.. المتظاهرون استغاثوا بـ (الإسماعيلية دوت كوم) التي ذهبت إليهم، ورصدت شكواهم، ونقلت هنا صرختهم “ارفعوا عنا ظلم المحافظ وقراراته المتعسفة”.. هكذا وصفها بعض المتضررين من أصحاب الوقفة الاحتجاجية.

في البداية يقول عبده خطاب محمد 55 سنة : كنت باشتغل “جزمجى” ودلوقتى راجل عاجز جت لى جلطة ومشلول.. أعيش على 140 جنيه من الشئون، باكل واشرب بيهم أنا و4 عيال وابنى متجوز وعايش معايا هو ومراته.. أروح فين لما يطردوني برة البيت ؟ أنا واخد الشقة دى من يوم ما حصل السيل الكبير اللي وقعت فيه وغرقت بيوت كتيرة في الاسماعيلية، فوقع البيت باللى فيه وأخذت هذه الشقة.. (غرفة وصالة) أعيش فيها أنا والعيال، وابنى ومراته، بقى لنا 28 سنه فيها.. نروح فين؟
بضعف واضح، يواصل خطاب قائلا: أنا راجل “أرزقي” على باب الله، وأهل الخير بيساعدونى.. إحنا بندفع 20 و24 جنيه إيجار، ومش قادرين حتى ندبرهم، هنقدر إزاى ناخد سكن بـ 160 جنيه في المستقبل؟ نجيب المبلغ ده منين؟

أما محمد السيد فيقول : أنا عايش في شقة من أيام السيل، من 28 سنة، وباقي لي سنة وأتملكها. هو جاى النهاردة عاوز يديني شقة أستمر في دفع إيجارها من أول وجديد، 30 سنة جاية.. ومين يعيش؟! يعني “كأنك يا أبو زيد ما غزيت”.. ده غير الفلوس اللي صرفتها على شقتي، بقى لي 28 سنة باصرف عليها كل قرش أكسبه.. صرفت عليها كتير والله، وعلى السطح عشان بينزل مطر علينا بيبهدلنا.. نجيب فلوس للناس دى منين؟ ويهدها ليه؟ وبناء على إيه؟ الشقق دى غير آيلة للسقوط، ومفيهاش عيب.. هاتوا خبراء  يقولوا رأيهم في الموضوع ده.. في شقق الهيئة (هيئة قناة السويس) لما بيحصل لها حاجة بيتم ترميمها، لكن مش بيهدوها، طيب ما يرممولنا.. ده كيان العمارة ثابت، والعمدان ثابتة.. إيه اللى يخللي المحافظ وهو قاعد على الكرسي “المكيف” بتاعه، يقول نهد؟ ما يعرفش هيشرد كام أسرة.. العمارات دي فيها 160 أسرة.. تخيل عدد أفراد الأسر دي؟ الناس دول يروحوا فين؟

أمل السيد أحمد : أنا جوزى متوفى، ومعايا 5 أولاد يتامى، وأم مكفوفة وعاجزة وبادفع الإيجار 24 جنيه “بالعافية”، ومعايا أخويا متجوز، وقاعد معايا.. نروح فين؟ يعنى أشيل أمي تموت هناك وجوزى ميت بقى له 23 سنة؟ إحنا شايفين المر في عيشتنا، ناقصين كمان الفخراني يسقينا من المر، واحنا شاربينه كل يوم “كاسات”؟ ده بدل ما ييجوا يخففوا عننا، ويسعدونا، جايين يزودوا همومناً!! اتق الله فينا يا سيادة المحافظ وارحم من في الارض يرحمك من فى السماء.

وتتحدث مني: أنا مطلقة، ومستأجرة الشقة، أروح فين؟ اترمي في الشارع انا وعيالي؟ معايا ولدين وجوزى مطلقني.. قاعدة في غرفة وصالة.. أروح فين لما يطردوني من الشقة؟ في المستقبل أى إيجار 500 و600 جنيه، ده غير المقدم اللي لا يقل عن 3 آلاف جنيه.. أجيب المبلغ ده منين، وأنا باشتغل عشان يادوب أوفر لقمة العيش لعيالى؟ وأروح بعيالي فين؟ يعنى نسيب الشقة واترمي انا وعيالى في الشارع؟ ولا أجيب خيمة واقعد فيها أنا وعيالي؟ إحنا مستأجرين وأنا لا معايا راجل ولا معايا حد غير ربنا وهو اللي يعلم أنا باكل وباشرب إزاى وبادفع الإيجار إزاى!!